Kryerja e analizave laboratorike në periudha të caktura të vitit është e rëndësishme për të gjithë ne sepse në bazë të tyre zbulohen disa nga diagnozat e fshehura në organizëm. Por fatkeqësisht në jo pak raste pacientët shqiptarë ankohen për rezultatet që derivojnë nga laboratorët e ndryshëm, duke bërë që ata të humbasin besueshmërinë dhe ti nënshtrohen të njëjtave analiza disa herë në laboratorë të ndryshëm. Në fakt në sistemin tonë shëndetësor pacientët i drejtohen si publikut apo edhe privatit për kryerjen e tyre, duke qenë se ka një gamë të gjerë të rrjetit laboratorik, i cili është mjaft i rëndësishëm sepse përcakton 80% të rezultateve për vënien e një diagnoze apo për ndjekjen e një diagnoze të një pacienti, me të cilën ne përballemi çdo ditë. Por sa rëndësi ka laboratori që ne zgjedhim, dhe cilat janë kriteret që duhet të përmbushë ai që të jenë në bazë të të gjitha parametrave të vendosur.