Sëmundjet kardiovaskulare janë shkaktari kryesor i vdekjeve por edhe paaftësisë në mbarë botën. Organizata Botërore e Shëndetësisë ngre shqetësimin rreth këtyre sëmundjeve, të cilat çdo vit 'vrasin' 17,9 milionë njerëz. Nga këto vdekje, 80% ndodhin për shkak të sëmundjeve koronare të zemrës (p.sh. atak në zemër) dhe prekin kryesisht vendet me të ardhura të ulëta dhe të mesme. Stili i jetës që bën pacienti, historiku familjar janë disa nga faktorët kryesorë, por e rëndësishme është që në ditët e sotme me kontrollet e duhura mjekësore dhe me trajtimet që rekomandojnë mjekët mund ti parandaloni këto sëmundje. Për fat të keq edhe në Shqipëri, sëmundjet e zemrës në vitet e fundit janë një ndër shkaktarët kryesorë të vdekjeve duke shkaktuar rreth 60% të vdekshmërisë.