E ka nisur rrugën e muzikës në moshë të hershme, ku fillimisht kreu shkollën e mesme për violinë dhe më pas në moshën 21- vjeçare u diplomua nga Konservatori Claudio Monteverdi në Bolzano të Italisë. Tenori shqiptar me famë botërore Saimir Pirgu, ka bërë rrugë të gjatë në karrierën e tij nga violina në skenat e operës me interpretime magjike, të vlerësuara shpesh dhe nga mediet e huaja. Si një ndër artistët me një kalendar artistik të ngjeshur, pas interpretimit të “La Boheme” në Los Angelos disa ditë më parë, aktualisht e gjejmë të angazhuar me operën “Carmen” në Gjermani e cila si fillim është shfaqur me datë 16 tetor dhe do të vijojë sërish me datë 25 tetor, pra ditën e nesërme. Për të zbuluar më shumë emocione rreth kësaj shfaqje dhe rolit të tij, si “Don Jose” por dhe agjendën e ngjeshur që e pret këtë sezon artistik ishim sot në mëngjes me të në një lidhje skype nga Berlini.