Poeti Rudolf Marku u shpall "Poeti Laureat" i parë shqiptar dhe përgjatë dy viteve ai do të jetë në krye të një fushate për të promovuar poezinë shqipe. Në vlerësimin për këtë titull, është vlerësuar shërbimi i çmuar që Marku i ka bërë kulturës kombëtare, duke sjelle në shqip shumë nga kryeveprat e poezisë botërore. "Porti Laureat" është një vlerësim që jepet për herë të parë dhe do të shënojë një traditë të re në komunikimin poetik brenda dhe jashtë Shqipërisë. Marku është autor i disa vëllimeve poetike, romaneve, shkrimeve publicistike dhe përkthyes i shumë autorëve të njohur të shekullit XX. Poezitë e Rudolf Markut janë përkthyer dhe botuar në anglisht, frëngjisht, gjermanisht, italisht dhe në disa gjuhë të tjera. Çmimi “Poeti Laureat”, njihet në mbarë botën si një vlerësim i poetëve të cilët shquhen për krijimtarinë e tyre dhe synon të ndërgjegjësojë mbi rëndësinë e leximit të poezisë. Por procesi i Poetit Laureat u shoqërua me debate mbi krijimtarinë e para viteve '90. U publikuan madje dhe vargje të kandidatëve për këtë çmim dedikuar Partisë dhe komunizmit, debat ku u përfshi edhe fituesi i çmimit "Poeti Laureat". Por si e gjykon Rudolf Marku këtë debat?