Njëri prej partnerëve të rimartohet jashtë vendit për dokumentet e qëndrimit, kjo sipas avokates Megi Zonja, është arsyeja e dytë pse janë shtuar divorcet pas dhunës në familje që vazhdon të jetë prej vitesh në vendin e parë të arsyeve. Sipas të dhënave zyrtare të Gjykatës së Tiranës, deri në tetor të këtij viti janë regjistruar 621 padi për zgjidhje martese, 160 më shumë se vitin e shkuar (për këtë vit kanë mbërritur mbi 1500 çështje të reja, ndërkohë për 2018-n ishin rreth 1600). Sidomos në tre vitet e fundit, në Gjykatën e Tiranës është vënë re një rritje e numrit të divorceve në përgjithësi, por edhe e atyre padive fiktive apo divorceve me marrëveshje, me qëllim që njëri prej tyre të rimartohet jashtë vendit për të siguruar dokumentet e qëndrimit. Të paktën kështu deklarojnë avokatët civilistë që ndjekin këto divorce, edhe pse palët deklarojnë shkaqe të tjera si motiv të ndarjes. Për shkak të gjendjes ekonomike njëri prej bashkëshortëve ka emigruar dhe ka lidhur martesë fiktive, thjesht për t’u pajisur me dokumente. Raste të tilla më të shumta duket se ka pasur në Greqi, por së fundmi edhe në Gjermani.