Wake Up/ Robert Aliaj dhe vajza Gala në izolim prej 15 ditësh, pikturojnë dhe i këndojnë atdheut

Ai është një artist që njihet për origjinalitetin e tij dhe që prej vitesh së bashku me familjen jeton dhe punon në Belgjikë (Bruksel), por udhëtimet për në Shqipëri i ka të shpeshta. Po flasim për artistin Robert Aliaj i cili së bashku me familjen janë vetizoluar prej 15 ditësh. Kujtojmë se me datë 27 mars Këshilli Kombëtar i Sigurisë në Belgjikë vendosi të zgjasë masat e kontrollit për Kovidin 19 deri më 19 prill ndërsa në një konferencë për shtyp, kryeministrja belge, Sophie Wilmès tha se ky vendim mund të rinovohet për dy javë deri më 3 maj, në varësi të situatës. Por si po i kalon këto ditë karantinimi artisti shumëdimensional; Robert Aliaj dhe vajza e tij Gala. Roberti përmes një lidhje skype na tregoi çdo cep të shtëpisë dhe se sa kreative mund të jetë qëndrimi në shtëpi për të dhe vajzën e tij Gala. Kujtojmë se Gala Aliaj në muajin shkurt ka mahnitur jurinë e “The Voice Kids Belgium”. Ajo ka shkëlqyer në fazën e audicioneve të fshehta në vendin ku ajo ka lindur dhe është rritur. Gala konkuroi me këngën “Don’t know Why” të Norah James dhe bëri që të katërt anëtarët e jurisë të kthenin karriget që në notat e para muzikore. Gala këndoi ekskluzivisht për ne një motiv nga kënga e Norah James por na surprizoi padyshim me këngën e njohur shqiptare "Për ty atdhe".