Ndërsa përballemi me një të ardhme të re dhe ende të panjohur, vaksinat do të vazhdojnë të shërbejnë si themeli i shëndetit dhe mirëqenies për të gjithë. Jemi në Javën Evropiane të Imunizmit dhe nevoja urgjente për një vaksinë kundër Kovid-19 thekson rolin kyç që imunizimi luan në mbrojtjen e jetëve dhe të ekonomisë së një vendi. Programet kombëtare rutinë të imunizimit janë më kritike se asnjëherë më parë. OBSH dhe UNICEF kanë bërë thirrje që qeveritë e rajonit të përdorin çdo mundësi që të mbrojnë njerëzit nga sëmundjet e ndryshme për të cilat ka vaksina. Por në çfarë situate ndodhet Programi Kombëtar i Vaksinave në Shqipëri, në një kohë që jemi në shpërthimin edhe të shumë sëmundjeve të tilla si fruthi, variçela apo lija e dhenve. Duhet thënë se në Shqipëri ka një mbulesë vaksinale mbi 95 përqind.