"TikTok" është një ndër aplikacionet argëtuese online, i cili po tërheq gjithmonë e më shumë kryesisht adoleshentët në të gjithë botën, duke mos përjashtuar edhe Shqipërinë. Përmes tij mund të krijosh video të shkurtra 15 sekonda, ku ndër të tjera ekspozohen edhe imazhe që lidhen me bullizmin, imitimin e shembujve negativë apo edhe me pamje pornografike. Ky aplikacion është përhapur edhe tek nxënësit e shkollave fillore duke ngritur kështu një shqetësim të madh për ekspertët dhe prindërit. Siguria e fëmijëve është një nga shqetësimet kryesore që vijnë nga ky aplikacion. Ideatorët e aplikacionit thonë se ekziston një udhëzues që tregon se aplikacioni mund të përdoret nga fëmijët nën 18-vjeҫ me pëlqimin e prindërve. Por ekspertët nga ana tjetër thonë se nuk kanë parë asnjë tabelë që kërkon verifikimin e prindërve, teksa hap një llogari në "TikTok".