Frika nga virusi po bën që njerëzit të tregojnë edhe anë që nuk ua kemi njohur. Sikur të mos mjaftonin paragjykimet e gjithëfarëllojshme që kemi si popull, duket se Covid-19 po krijon vërtet një distancim social, por kësaj radhe në formën e stigmatizimit. Psikologia, Arjana Muçaj shprehet se ky virus do të ndikojë në sjelljen e secilit prej nesh dhe kjo do të reflektohet kur ne të lëmë mjediset e shtëpisë dhe të fillojmë atë rutinën tonë të përditshme. "Kam përshtypjen se gjëja e parë që do të ndryshojë do të jenë ato kontaktet fizike me rrethin shoqëror apo grupin social ku ne bëjmë pjesë. Nëse deri dje përqafimet dhe shtrëngimet e duarve kanë qenë prezente kjo do të jetë reflektimi i parë në sjelljen që ne do të bëjmë si shoqëri. Nuk do të përqafohemi si dikur me njëri-tjetrin por do të mjaftohemi thjesht me një përshëndetje, atë që ne ndoshta e kemi parë tek të huaj dikur dhe na dukej e çuditshme. Tashmë kjo s'do na duket më aq e çuditshme. Deri dje kafenetë ishin të preferuarat tona dhe baret ishin plot. Besoj se pasi të dalim nga ky izolim edhe në kafene do të ruajmë distancat me njëri-tjetrin. Besoj edhe koha e qëndrimit jashtë shtëpisë do të jetë më e shkurtër nga ajo që ne kemi pasur më parë për efekt të asaj që ndodhi me jetën tonë sociale për shkak të virusit."- tha psikologia Muçaj