Për të respektuar kushtet e reja të ruajtjes së shëndetit dhe të respektimit të distancës sociale gjatë pandemisë, një pjesë e administratës publike do të punojë nga shtëpia. Kjo rregullore është miratuar nga Departamenti i Administratës Publike duke përcaktuar edhe mënyrën se si do të punohet online nga shtëpia të një pjese të administratës publike, por edhe për ata që do të punojnë nga zyra duke respektuar distancën prej 2 metrash. Sipas të dhënave të INSTAT, në fund të 2019-s, në sektorin shtetëror ishin të punësuar 174 mijë persona. Në raport me një vit më parë, numri i të punësuarve në administratë është rritur me rreth 1,500 persona. Të punësuarit në sektorin shtetëror përbëjnë 15% të totalit të të punësuarve në vend. Rreth 45% punojnë në sektorin privat jobujqësor dhe 40% janë në sektorin privat bujqësor.