Pse e lënë shqiptarët punën? Çfarë i bën ata që të lëvizin nga një vend te tjetri? Në Shqipëri dhe Kosovë shqiptarët paguhen shumë pak dhe janë të gatshëm që të largohen dhe të punojnë për këdo që i paguan pak më shumë. Ndërkohë në të dy anët e kufirit njerëzit largohen nga puna për të ikur jashtë shtetit dhe kjo mbetet një trend i vazhdueshëm në rritje. 65% në Shqipëri dhe 43% në Kosovë largohen për një punë jashtë shtetit. Të dhënat vijnë nga një sondazh i EPPC Albania and Kosovo, i kryer me kompani në Shqipëri dhe Kosovë. Të dhënat e raportuara nga 23 kompani në Shqipëri dhe 14 kompani në Kosovë mbulojnë jo vetëm pagat e punonjësve, por edhe politikat dhe procedurat që zbatohen në këto kompani, të cilat shërbejnë si kampion për të analizuar tregun e punës në paga, përfitime dhe politika e procedura të zbatueshme në të dy vendet. Erald Pashaj, EPPC Albania & Kosovo i ftuar në Wake Up në Top Channel analizoi rezultatet e këtij sondazhi.