Numri i rasteve me COVID-19 në Shqipëri sa vjen e rritet. Në mungesë të testimeve të shtuara, numri i rasteve të raportuara duket se nuk e pasqyron gjendjen reale të epidemisë dhe i vetmi orientim deri diku i saktë vjen nga numri i personave që humbin jetën. Sipas disa epidemiologëve, me një mesatare prej 3 vdekjesh në ditë, duke ditur shkallën e vdekshmërisë prej 0.5%, përllogaritet se në popullatë mund të ketë rreth 600 raste të reja në ditë, çka përkthehet në rreth 30-40 shtrime në spital, prej të cilëve 5-10 raste mund të kenë nevojë për kujdes intensiv. Shifra këto që, nëse materializohen, ndodhen në limitet që mund të përballojë sistemi shëndetësor shqiptar. Sa u takon viktimave ndërkohë, autoritetet shprehen se, shkalla mbetet në nivelin 2.66%. Ç'duhet bërë në këto rrethana? A ka ndryshuar virusi, apo sjellja jonë? Po besimi i publikut me çfarë informacioni është dhënë në gjithë këtë situatë pandemia a është lëkundur? Prof.Asoc.Fabian Cenko, epidemiolog, UKZKM jep përgjigje pyetjeve dhe formulën që duhet ndjekur në këtë situatë.