Ҫdo ditë dëgjojmë për raste të aksidenteve të shkaktuara nga drejtues të papërgjegjshëm të automjeteve. Shpejtësia tej normave, konsumimi i alkoolit, mungesa e rripit të sigurimit apo përdorimi i telefonit janë disa nga shkaktarët kryesore që sjellin edhe viktima në njerëz. Vetëm pak ditë më parë dy 17 vjeçare humbën jetën pasi makina u përplas me një pemë për shkak të shpejtësisë. Menjëherë pas këtij aksidenti një tjetër 17 vjeçar humbi jetën pasi drejtuesi i mjetit ishte pa patentë dhe në gjendje të dehur. Drejtuesit e papërgjegjshëm na rrezikojnë jetën çdo ditë pasi nuk janë të pakta rastet kur makinat përfundojnë buzë shkollave apo çerdheve, apo në brendësi të bizneseve të ndryshme, siç ka pasur raste në dyqane apo kafene. Ndonëse policia ka artikuluar herë pas herë për shtim të masave që lidhen me shkeljet rrugore, përsëri bilanci i aksidenteve mbetet i lartë. Po ashtu edhe kontrollet në rrugë janë shtuar, aq më tepër kur në prag të festave edhe aksidentet priret të shtohen.