Pandemia na ka bërë që të distancohemi nga njeri-tjetri dhe të ndiejmë shpeshherë edhe mungesën e një përqafimi. Dikur kjo ishte më se e zakonshme, aq më tepër për ne ballkanasit që kulturalisht jemi edhe shumë të afrueshëm dhe se kuptojmë dot një marrëdhënie pa përqafim. Pandemia ndikoi që ku gjest afrimiteti mes njerëzve të praktikohet çdo ditë e më pak. Në këto kohë krize përqafimesh që po përjeton mbarë bota duket se terapistët po i drejtojnë njerëzit që të praktikojnë forma nga më të ndryshmet për të kaluar stresin, mërzinë, apo qoftë edhe për të ndjerë praninë fizike të dikujt. Dhe ky "dikush" është kafsha. Duke iu referuar BBC, terapia e "përqafimit të lopës" është trendi më i çuditshëm që po praktikohet tashmë në vende të ndryshme të botës. Temperatura e ngrohtë e trupit e lopës, rrahjet e ngadalta të zemrës dhe madhësia e nofullës mund ta bëjnë përqafimin e këtyre kafshëve një eksperiencë tepër qetësuese për njerëzit. Kjo lloj terapie është shndërruar në një trend në Amerikë, Holandë, Zvicër dhe vende të tjera evropiane. Përqafimi i lopës besohet se nxit pozitivitetin dhe zvogëlon stresin duke rritur oksitocinën tek njerëzit, hormoni që çlirohet teksa kemi kontakte njerëzore. Në mungesë të lopës terapistët këshillojnë njerëzit që të përqafojnë edhe kafshë të tjera shtëpiake me të cilat janë më të lidhur emocionalisht. Ekspertët tregojnë se sa më të mëdhenj të jenë gjitarët, aq më e këndshme është kjo si eksperiencë. Një studim i botuar në revistën "Applied Animal Behavior Science" thotë se po ashtu lopët tregojnë shenja relaksimi të thellë kur njerëzit janë të dashur me to.