Që nga shfaqja e rasteve të para me Covid 19 në Shqipëri, tashmë numri deri ditën e djeshme ka shkuar në 42 persona, ku rreth 17 prej tyre marrin shërbim mjekësor pranë Spitalit Infektiv në QSUT. Në fakt edhe këtë javë ashtu si në javën e kaluar vazhdojnë masat drastike të marra nga autoritetet, ku gjithçka është e mbyllur me përjashtim të dyqaneve që ofrojnë produkte ushqimore dhe ato farmaceutike. Sipas autoriteteve të shëndetësisë këto masa janë të nevojshme për të ngadalësuar përhapjen e virusit, por jo për ta ndalur atë. Edhe më herët mjekët infeksionistë kanë thënë se jemi vetëm në fillimet e përhapjes së këtij virusi në territorin tonë, ndërkohë që të gjithë qytetarët duhet të vazhdojnë të kufizojnë sa më shumë lëvizjet e tyre dhe të zbatojnë rregullat që rekomandojnë mjekët. Deri ditën e djeshme pacientët e shtruar në spitalin infektiv kanë qenë në gjendje të stabilizuar, me përjashtim të dy pacientëve të cilët vazhdojnë të marrin shërbim në terapi intensive. Por si është situata në Spitalin Infektiv në QSUT, dhe si paraqitet gjendja shëndetësore e pacientëve. Ishim në një lidhje me doktor Pëllumb Piperon, mjek infeksionist pranë këtij spitali.