Të paktën që nga e premtja e datës 13 mars, nga katër apo pesë raste të reja janë shtuar përditë të infektuar zyrtarisht nga Covid-19. Kjo deri dje, kur u vu re një kërcim i numrit të infektuarve, me 13 të tillë, duke e çuar në 89 në total numrin e të infektuarve në Shqipëri. Mosha mesatare e totalit të rasteve pozitive deri tani është 48 vjeç. Ndërsa mosha mesatare e rasteve të hospitalizuara është 54 vjeç. Në Spitalin Infektiv janë 43 pacientë të shtruar, katër prej tyre janë në terapi intensive. Ndërkohë sot u konfirmuan edhe dy raste të humbjes së jetës nga koronavirusi në vendin tonë. Por si po trajtohen të sëmurët që janë në terapi intensive. Doktor Pëllumb Pipero në një lidhje skype tha se, po ndiqet skema e vendeve si Kina dhe Italia. "Duhet t'ju them se ata janë trajtuar sipas eksperiencës së marrë nga Kina dhe Italia dhe nga vendet e tjera; me dy antiviralë dhe oksigjen, kjo e fundit ka qenë zgjidhje dhe jo zgjedhje pasi të gjithë ata që janë në terapi intensive kanë marrë oksigjen dhe sipas rastit kanë marrë edhe kortizonikë. Kjo është një skemë jo vetëm e miratuar në heshtje por edhe një eksperiencë e fituar nga kolegët tanë në Kinë dhe Itali. e cila ka qenë efektive. Aktualisht në kujdesin e terapisë intensive janë katër persona dhe asnjëri prej tyre nuk është i intubuar edhe pse janë me ndihmën e respirtatorit, ata janë në gjendje stabël"- tha Pipero