Wake Up/ Pasivizimi i adresave të shqiptarëve në Preshevë, ka qëllim ndryshimin etnik të popullsisë

Prej kohësh në Luginën e Preshevës është konstatuar një problematikë, ajo e pasivizimit të adresave të shqiptarëve që kanë jetuar në komunat e kësaj lugine. E thënë më thjeshtë, këtyre mijëra shqiptarëve ju janë fshirë adresat dhe ata nuk figurojnë si shtetas të Serbisë, duke humbur në këtë mënyrë edhe shumë të drejta si individë një nga të cilat është e drejta e votës. Ky fenomen sipas autoriteteve të Luginës së Preshevës ka nisur vite më parë, më intensivisht është zbatuar në Medvegjë tek shqiptarët që në 99-ën janë larguar dhunshëm nga Medvegja dhe jetojnë në Kosovë. Këta shqiptarë nuk e kanë të rregulluar statusin civil në Kosovë, që do të thotë se akoma janë shtetas edhe me vendbanim në Medvegjë. Por, në kuadër të ligjit për caktimin e vendbanimit po shfrytëzohet një dispozitë e cila thotë se nëse qytetari nuk është duke banuar në vendbanimin që e ka paraqitur, atëherë ai vendbanim pasivizohet. Këtë fenomen e ka denoncuar si Tirana zyrtare dhe ajo e Kosovës. Para disa ditës ministrat e jashtëm të të dyja vendeve, Gent Cakaj dhe Ministrja e Punëve të Jashtme dhe Diasporës Meliza Haradinaj-Stublla kanë shprehur shqetësimin e thellë lidhur me procesin e fshirjes së qëllimshme të adresave të shqiptarëve në Luginën e Preshevës. Ata thanë se fshirja e adresave të shqiptarëve në Luginën e Preshevës është duke krijuar jo vetëm një pasqyrë krejtësisht të pasaktë të përbërjes demografike të atyre hapësirave dhe të numrit të shqiptarëve në Serbi, por edhe duke shkelur rrënjësisht të drejtat e liritë themelore të tyre, përfshirë të drejtën e votës. Ragmi Mustafa, Kryetar i Këshillit Kombëtar Shqiptar, Lugina e Preshevës tha se qëllimi kryesor është që të bëhet ndryshimi artificiali strukturës etnike të popullsisë në Luginën e Preshevës