Biznesi në Shqipëri ka nisur të ndjejë pasojat e virusit që ka shkaktuar panik në gjithë botën dhe ka tronditur bursat globale. Ndikimi po vjen nëpërmjet dy prej shteteve më të prekura, Italisë dhe Kinës. Italia është partneri kryesor i Shqipërisë, me 33% të volumit tregtar, ku efekti më i lartë mund të jetë tek eksportet, ndërsa Kina është partneri i tretë tregtar i vendit, sa u përket importeve. Të lidhur shumë ngushtë me Italinë, biznesmenët shqiptarë po kufizohen në marrëdhëniet e tyre tregtare. Si ndikon e gjitha kjo? A ka një panik të shtuar që, në fakt, është më i dëmshëm për ekonominë sesa vetë koronavirusi?Shqipëria ka lidhje të fortë tregtare me Italinë, sidomos sa u përket eksporteve. Sipas INSTAT, drejt Italisë shkojnë 48% e totalit të eksporteve në 2019-n, ku peshën kryesore se zënë tekstilet e këpucët, (rreth 60% e totalit), e më pas “Materiale ndërtimi dhe metale”, “Makineri, pajisje dhe pjesë këmbimi”. Italia renditet dhe si partneri i parë për importet me 25% të totalit të blerjeve që bëjmë nga gjithë vendet e botës. Tregtia me Kinën zuri 6,9 për qind të volumit tregtar gjatë vitit 2019, duke u zgjeruar në raport me një vit më parë me 0.7 për qind. Tregtia dominohet nga importet, të cilat vitin e kaluar ishin 9.6 herë më të larta se eksportet. Sipas të dhënave të INSTAT, tregtia me Kinën gjatë vitit të kaluar u zgjerua kryesisht në drejtim të importeve, të cilat shënuan një vlerë prej 59,7 miliardë lekësh (458,4 mln euro) me një rritje me 11% në raport me vitin 2018.