Pandemia e KOVID-19 përshpejtoi një tendencë ku Shqipëria kishte mbetur mbrapa në raport me vendet e tjera, atë të rendjes pas teknologjisë së informacionit. Pandemia e tregoi se bizneset e përshtatura me teknologjinë dhe që kishin investuar në zgjidhje të avancuara teknologjike, jo vetëm mbijetuan, por edhe po krijojnë avantazhe të reja. Në një hark kohor prej 8 javësh, përdorimi global i e-commerce ka tejkaluar parashikimet që ishin bërë për dy deri në tre vitet e ardhshme. Tregtia online dhe sjellja e konsumatorit në raport me KOVID-19, ka ndryshuar në këtë mënyrë: 52% e konsumatorëve në BE dhe SHBA nuk do të kthehen më në dyqane ushqimore 58% e blerësve presin të porosisin më shumë në internet në muajt e ardhshëm 60% e konsumatorëve në BE do të vazhdojnë blerjet në internet në të njëjtin nivel edhe pas pandemisë. Gjatë muajit prill ka pasur rreth 15.2 milionë vizita në portalin e-Albania, ose afërsisht 4 herë më shumë se para pandemisë. Vetëm në 4-mujorin e parë të 2020, numri i përdorimeve të shërbimeve në total, ka tejkaluar totalin e përdorimeve të shërbimeve në vitin 2019. Vetëm në janar-prill ka rreth 312,000 përdorues të rinj në portal. E gjithë kjo panoramë shifrash është dëshmi e përdorimit dhe ndikimit real të teknologjisë në jetën e bizneseve dhe qytetarëve. Moshat e reja janë më të familjarizuarit në përdorimin e teknologjisë. Rreth një e katërta e përdoruesve në e-Albania, ose rreth 26%, janë të moshës nga 30 deri në 39 vjeç. Befasuese janë edhe shifrat e përdorimit për moshat 50-60 vjeç, kjo për shkak të lehtësisë së përdorimit të portalit. Sa i përket gjinisë, të dhënat janë vërtet interesante, pasi mbi 40% e përdoruesve janë gra.