Ata që janë në frontin e parë të kësaj "lufte" me virusin që po trondit gjithë botën me mijra të infektuar dhe viktima, nuk janë vetëm mjekët nëpër spitale. Me luftën e vërtetë po përballen edhe mjekët që ju shërbejnë pacientëve me Kovid-19 në shtëpi. Një eksperiencë e tillë po ndiqet në Itali, ku janë të shumtë mjekët dhe infermierët e njësive të vazhdueshme të ndihmës të cilët çdo ditë ndjekin nga afër pacientët e të gjitha grupmoshave për ecurinë e sëmundjes , duke i ndihmuar në vazhdimin e trajtimit të tyre me medikamente deri në shërimin e plotë. Një nga këta mjekë është dhe shqiptarja Mirsada Katica për të cilën në fakt mediat italiane kanë shkruar ditët e fundit, teksa ajo ju shërben pacientëve me Kovid-19 në zonat më të prekura të Lombardisë, në Bergamo dhe Breshia. E përlotur ajo tregoi momentet më të vështira që ka kaluar dhe kalon çdo ditë me pacientët e sëmurë me Kovid-19. "Është shumë e vështirë të shihje pacientët që vuanin dhe nuk gjenim oksigjen, nuk gjenim klorokinën, nuk kishte as vend në spital për t'i shtruar. Aty ndiheshim të pafuqishëm. Në këtë moment ishte tepër e vështirë të gjenim forcën brenda vetes që t'i jepnim dhe pacientit forcën për ta përballuar atë situatë të vështirë. Ndërkohë momentet më të gëzueshme ishin kur arrinim të sigurimin oksigjenin apo terapinë që i nevojitej pacientëve"- tha mjekja shqiptare që shërben në Spitalin e Breshias. Mirsada Katica ka mbaruar mjekësinë në Universitetin e Breshias ndërkohë sot ajo punon në qendrën ambulatore si mjeke dhe është pjesë e njësive speciale ndihmëse në terren që ju shërbejnë pacientëve me Kovid-19 në shtëpi. Mirsada është nga Shkodra dhe është larguar nga Shqipëria që prej 2003 dhe prej 17 vitesh jeton në Itali.