Italia, shteti ynë fqinj është vendi i 3-të më i prekuri përsa i përket viktimave dhe të infektuarve me Covid -19 dhe nevoja për bluzat e bardha, për mjekë dhe infermierë ishte mëse e domosdoshme për të shpëtuar jetët e pacientëve të prekur. Në një situatë të tillë, qeveria shqiptare me 28 mars dërgoi për ndihmë në Itali, Breshia 10 mjekë dhe 20 infermierë, të cilët iu bashkuan vullnetarisht thirrjes për të ndihmuar kolegët e tyre në vijën e parë të kësaj “lufte”. Sot me ne, do të jenë në lidhje skype dy infermierët shqiptarë, që përgjatë këtij muaji kanë përjetuar një eksperiencë të re dhe të vështirë. "Dua të veçoj j detaj human që më ka bërë shumë përshtypje. Të gjithë të sëmurët në spital mbanin mbi komodinat e tyre foto të familjarëve; dikush të nënës, dikush të fëmijëve etj. Kurioziteti më shtyu t'i pyes për arsyen se logjikisht mendon se është pamundësia e kontaktit me familjarët. Disa nga përgjigjet e tyre kanë qenë: Mbaj foton e nënës time të ndjerë këtu sepse ajo është engjëlli im mbrojtës dhe do më ndihmojë që unë t'ia dal. Një tjetër më tha: Mbaj foton e fëmijëve të mi sepse nëse unë do ta humb betejën nga Kovid dua që frymën e fundit ta jap në prani të imazhit të familjarëve të mi. Këto situata kanë qenë shumë prekëse për ne"- tregoi detaje nga përvoja e saj, Suela Horanlli infermieria shqiptare që shërbeu në spitalin italian.