Pavarësisht problemeve nga stuhitë e erës, mbingarkesë në rrjet nga temperaturat e ulëta, Petraq Lika, Drejtues i Sistemit të Shpërndarjes (OSSH) deklaroi se operatori i shpërndarjes së energjisë garanton që këtë dimër do të ketë 24 ore drita për qytetarët pavarësisht amortizimit 45 vjeçar të rrjetit. Ditët e fundit stuhitë e fuqishme të erës që kanë përfshirë një pjesë të madhe të vendit por edhe temperaturat e ulëta që shkojnë në disa minus gradë kanë sjellë probleme edhe në rrjetin e furnizimit me energji elektrike. Në Tiranë nga rrëzimi i pemëve janë dëmtuar disa linja të tensionit të lartë, por edhe në Krujë, Fushë-Krujë , Lezhë e në disa zona të tjera të vendit ka pasur probleme ditët e fundit në rrjetin e energjisë elektrike. Si pasojë e këtyre dëmtimeve qytetarëve i është dashur të përballen me orë të tëra mungesë të energjisë në banesat e tyre, ndërkohë që brigadat e OSHEE/ OST kanë qenë në terren që në momentin e defekteve për riparimin në kohë të avarive. Temperaturat e ulëta që po na shoqërojnë, por edhe fakti që dimrin e kemi përpara, sjellin normalisht edhe ngarkesë në rrjetin elektrik pasi energjia shihet si burimi kryesor për ngrohje.