Organizata Botërore e Shëndetësisë ka tërhequr së fundmi vëmendjen ndaj lodhjes pandemike që na ka shkaktuar të gjithëve periudha e zgjatur disamujore e krizës nga Covid-19. OBSH thotë se ky është një reagim i natyrshëm ndaj një situate që zgjat prej kohësh, së cilës nuk i shihet fundi. Dhe rreziku më i madh është që për shkak të “lodhjes” t’i kushtojmë më pak vëmendje rregullave të sigurisë. Sakrificat e mëdha - për të shmangur përhapjen e koronavirusit - kanë sjellë ‘kosto të jashtëzakonshme’, të cilat na kanë rraskapitur të gjithëve, pavarësisht se ku jetojmë apo se çfarë bëjmë. Në të tilla rrethana, është e thjeshtë dhe e natyrshme të ndiheni apatikë, të pamotivuar dhe të lodhur. Por çfarë duhet bërë? Arjana Muçaj, psikologe na tregoi sesi ta kalojmë lodhjen nga kjo pandemi e stërgjatur.