Në këto javë të vështira të pandemisë, personeli mjekësor mbetet më i rrezikuar pasi është në kontakt të vazhdueshëm me të infektuarit. Mbi të gjitha mjekët duhet të jenë të pajisur me të gjitha masat e nevojshme për t'u mbrojtur. Për t'i ardhur në ndihmë atyre, sipërmarrësi Alban Kardashi ka vendosur që të prodhojë maska mbrojtëse për stafin mjekësor dhe t'i dhurojë ato në spitale të ndryshme të vendit, sipas nevojave. Nuk bëhet fjalë për maska të thjeshta por ato shërbejnë si mburoja për fytyrën e mjekëve, pasi mbulojnë gojën, hundën dhe sytë. Kjo lloj maske shërben për stafet mjekësore dhe jo për qytetarët. Më konkretisht, dje ai ka dërguar rreth 200 maska në spitalin e Elbasanit, rreth 100 në Shkodër, 60 në Sarandë, 70 në Kavajë. Më herët Albani ka dërguar edhe rreth 70 maska në spitalin e Durrësit si edhe pranë maternitetit “Mbretëresha Geraldinë”. Kërkesat e spitaleve për maska të tilla janë gjithmonë në rritje. Albani ka një studio grafike ku prodhon objekte të ndryshme dhe aty gjenden pajisjet që mundësojnë prodhimin e këtyre maskave. Ne kishim në skype Alban Kardashi, sipërmarrësin që ka ndërmarrë këtë nismë.