Shkodra ditët e fundit është kthyer në vatrën e dytë më të madhe të Kovid-19 pas Tiranës. Rastet janë rritur në mënyrë të menjëhershme, mbi 70 raste ka aktualisht, ndërkohë që autoritetet shëndetësore pohojnë se infektimet e reja janë shënuar vetëm në rastet e disa familjeve ku më parë kishin rezultuar të infektuar me Kovid-19. Pra, nuk kemi përhapje komunitare të virusit. Këto ditë policia dhe ushtria ka zbarkuar në kryeqendrën e Veriut me forca të shtuara, ndërsa Bashkia e qytetit ka ashpërsuar masat e lëvizjes në tregjet dhe hapësira të tjera publike. Ne ishim sot në një lidhje direkte me Ardian Dajti, drejtor i Spitalit të Shkodrës i cili na solli një panoramë të situatës reale se çfarë po ndodh aktualisht në Shkodër. "Nuk më vjen mirë që Shkodra është bërë problem në rang Republike e ku flitet për një numër të madh të prekurish. Por mund të them se që nga periudha e para 2 ditëve ku kishte rritje të rasteve pozitiv mund të them se nga 32 rastet e dyshuara pardje ka rezultuar vetëm 1 rast pozitiv. Rezultatet e djeshme nuk kanë ardhur akoma. Kjo është situata reale në spital". Testimeve i janë nënshtruar edhe personeli mjekësor i Spitalit dhe sipas drejtorit Dajti ka një dezinformim përsa i përket edhe situatës në stafin mjekësor të spitalit. "Deri tani janë testuar 80 persona personel mjekësor nga të cilët 10 janë mjekë dhe të gjithë mjekët kanë rezultuar negativë. Pavarësisht deziformimit se ka mjekë të sëmurë mund të them se aktualisht nuk ka asnjë mjek të prekur nga Kovid-19 në Spitalin e Shkodrës. Janë testuar gjithashtu 60 infermierë nga të cilët 4 kanë rezultuar pozitivë dhe janë në karantinim. Kemi edhe personelin ndihmës që është testuar dhe të gjithë kanë rezultuar negativë. Ky është realiteti"- tha drejtori i Spitalit të Shkodrës, Ardian Dajti.