Taksa e ndërtesës që do vijë me faturën e ujit , nuk është më një lajm i ri. Por qytetarët duke filluar nga muaji dhjetor do të ndjejnë efektin e saj , në faturat që do të vijnë në banesat e tyre bashkë me shumën që do të paguajnë për ujin e pijshëm. Gjatë këtyre muajve qytetarët janë njoftuar për të bërë vet-deklarimin e metrave katrorë pranë pikave të ndërmarrjes së Ujësjellës Kanalizimeve me qëllim që kjo taksë të llogaritet në mënyrë të saktë. Më herët kujtojmë se qytetarët e Tiranës kanë paguar 100 lekë çdo muaj, por ajo tani do të përllogaritet në bazë të sipërfaqes së banesës dhe çmimit për metër katror. Ndërkohë nga kjo taksë do të përjashtohen disa kategori në bazë të vendimit të qeverisë. Por si ka ecur procesi i vet-deklarimit të pronës, si do të veprohet me llogaritjen e kësaj takse, apo çfarë do të ndodhë me ata që ende nuk e kanë deklaruar sipërfaqen ku banojnë , apo kryejnë një aktivitet biznesi. Por çfarë do të ndodhë edhe me ata banorë që tashmë pallatet apo ndërtesat e tyre janë shpallur të pabanuara për shkak të tërmetit të 26 nëntorit, a do ti paguajnë detyrimet ndaj ujësjellësit në Tiranë?