Autoritetet rajonale në Itali kanë vendosur dje edhe më shumë masa shtrënguese, pas dekretit të fundit të 22 marsit kryeministrit italian Xhuzepe Konte. Këto tre ditët e fundit, në të gjithë Italinë në total numri i viktimave ka ardhur në rënie, ndonëse ai mbetet ende shumë i lartë. Mjeku Shpëtim Baçi, jeton prej 20 vjetësh në Parma dhe punon prej 17 vjetësh në spitalin e Parmës. Në një lidhje skype nga spitali i Parmës që është kthyer në spitalin që ka pritur numrin më të madh të infektuarve me koronavirus në 24 orët e fundit, ai na sqaroi për situatën atje. "Masat që ka marrë qeveria italiane kohët e fundit janë shumë të mira. Në fillim nuk ishte kështu. Italia u ndërgjegjësua për rrezikun nga koronavirusi 4 javë pasi ai kishte mbërritur në vend dhe ndoshta tani është vonë por ka lajme të mira përsa i përket të infektuarve dhe rasteve të vdekjeve në krahasim me një javë më parë."- tha mjeku Shpëtim Baçi. Ai pranon dhe faktin se për të gjithë mjekët është hera e parë që ndodhen përballë këtij infeksioni të mushkërive që ka një shpejtësi të lartë të përhapjes së sëmundjes. "Mekanizmi i veprimit është akoma i pasqaruar por ajo që është vënë re është fakti se 99% e virusit Covid-19 prek qelizat e mushkërive dhe vetëm 1 % prek edhe qelizat e aparatit tretës". - tha ai