Teksa infeksioni i Kovid-19 është duke u përhapur me shpejtësi në mbarë botën, njerëzit kanë filluar të përdorin në masë maskat duke mbuluar hundën dhe gojën për një shmangie të mundshme të virusit. Por në të gjithë këtë situatë nuk duhet të harrojnë dhe sytë, të cilat konsiderohen si porta hyrëse të këtij virusi të rrezikshëm. Ndaj dhe këshilla kryesore që ka rekomanduar OBSH që në fillimet e kësaj pandemie, është mos prekja e fytyrës me duar. Krahas mjekëve infeksionistë që janë në vijën e parë të trajtimit të pacientëve me Covid19 përpara një rreziku të madh janë dhe mjekët, okulist të cilët çdo ditë duhet të vizitojnë pacientë, madje të konstatojnë dhe raste të dyshuara. Kujtojmë që i pari që foli për rrezikun nga koronavirusi ishte mjeku okulist në Kinë, Li Uenliang i cili dha alarmin për përhapjen e koronavirusit, por nuk u dëgjua.Li Uenliang, një mjek i njohur në të gjithë botën ndodhej në Wuhan nga ku dhe parashikoi epideminë, ndërkohë për fat të keq ai humbi dhe jetën nga ky virus. Por si vlerësohet Covid-19 nga mjekët tanë okulistë, si duhet t'i trajtojmë sytë në këtë periudhë, cilat janë shenjat që mund të jemi prekur... Për të gjitha këto kishim në një lidhje Skype, mjekun okulist Rubin Topi pranë Poliklinikës së Specialiteteve nr 1 në Tiranë.