Instituti Kombëtar i Shëndetësisë Publike i Kosovës, ka njoftuar se në Kosovë ende nuk ka asnjë rast të konfirmuar me koronavirus. Këtë e konfirmoi edhe Valbon Krasniqi, mjek infektiolog në Klinikën Infektive në Prishtinë në një lidhje skype me emisionin Wake Up. Megjithatë qeveria dhe komunat e Kosovës kanë nisur që dje marrjen e masave drastike parandaluese për Covid-19. Për shkak të rrezikut më të lartë nga virusi për të moshuarit, nga dje mbyllen përkohësisht Qendrat Sociale për të Moshuarit në Prishtinë, ku gjithashtu po bëhet edhe dezinfektimi i të gjithë autobusëve. Qeveria e Kosovës ndërkaq ka miratuar planin për reagim lidhur me koronavirusin, ku përfshihet një buxhet prej 10 milionë eurosh, për t’i pajisur të gjitha institucionet shëndetësore, emergjencat si dhe për adaptimin e objekteve për të trajtuar rastet që mund të paraqiten. Ky buxhet dhe plan fillimisht është hartuar nga Ministria e Shëndetësisë dhe më pas është dakorduar edhe nga Këshilli Kombëtar i Sigurisë. "Rasti i parë i dyshuar ka qenë më 18 shkurt dhe ishte një person që kishte udhëtuar nga Zvicra. Deri tani ne kemi testuar 70 të dyshuar dhe të gjithë kanë dalë negativ"- tha mjeku Valbon Krasniqi nga Klinika Infektive e Prishtinës në një lidhje skype me Wake Up.