Breshia njihet si një nga zonat me më shumë shqiptarë. Por a ka një shifër se sa shqiptarë ka të prekur apo të ndarë nga jeta me Kovid-19?. Mjeku Julian Balla që prej 10 vitesh punon në spitalin e Breshias tha përsa i përket shqiptarëve të prekur apo që kanë humbur jetë nga Kovid -19 që deri tani nuk ka një database të dhënash të ndarë sipas kombësive. "Në asnjë databasë të dhënash që është bërë publike deri tani nuk është nacionaliteti i personave të prekur. Mund të flas për spitalin ku jam unë që për momentin janë të shtruar 5 pacientë që janë me kombësi shqiptare. Gjendja e tyre është e mirë. Janë në përmirësim. Dy janë në moshë mbi 75 vjeç dhe janë një çift bashkëshortësh dhe brenda kësaj javë besoj do të dalin, ndërsa 3 të tjerë që janë pak më të rinj në moshë dhe janë në fazën e përmirësimit të sëmundjes por besoj se hospitalizimi i tyre do të zgjasë dhe një javë më shumë. Por asnjëri nuk është në rrezik për jetën dhe nuk janë në terapi intensive". Por duhet shtuar se shumë njerëz janë të ngujuar në shtëpitë e tyre në Breshia. Shumë të afërm të tyre vdesin të vetëm në spital. Ndërkohë që një dramë brenda dramës është edhe ajo e varrimit të atyre që ndërrojnë jetë. Por që ka shumë familje, të cilat në pamundësi që të ndjekin funeralin, as që e dinë ku janë varrosur të afërmit e tyre, madje ka fotografë që punojnë falas për të fotografuar vendin ku varroset dikush për t’u ardhur në ndihmë familjeve. Këtë situatë mjeku Balla e komentoi si shumë dramatike si për familjarët por edhe për vetë mjekët.