Muaji nëntor ka hyrë i frikshëm përsa u përket shifrave të Covid-19! Me një numër mesatar rastesh mbi 500 në ditë, dje u shënuan 525 raste pozitive dhe 12-te humbje jete shifra më e lartë deri tan, nëntori ka shkaktuar mbushjen e shpejtë të shtretërve spitalorë. Mesatarja ditore e vdekjeve të raportuara ka arritur 6.3 ose 60% më tepër se mesatarja e tetorit. Nga ana tjetër nëse marrim vetëm një të dhënë, përqindjen e pozitivitetit, pra raportin mes testimeve të kryera ditore dhe rasteve të reja ditore, do të shohim që javën e kaluar e mbyllim me shifra alarmante në rritje. Të hënën, më 2 nëntor, pozitiviteti ishte 22.1% ndërsa të shtunën më 7 nëntor ishte 25,6%. Nëse tendenca vazhdon e papenguar, për pak ditë a mund të rrezikohet kolapsi i plotë i sistemit shëndetësor? Autoritetet shëndetësore kanë pohuar se në tryezën e Kryeministrit kanë vendosur tre skenarë që kanë të bëjnë me mbyllje të pjesësshme, ndërkohë që dje Komiteti Teknik doli me masat e para: kufizimin e levizjes nga ora 22.00-6 dhe mbylljen e bareve dhe restoranteve po në këtë fashë orare. Nga ana tjetër vende fqinje, të cilat në bazë të shifrave ditore kanë një përqindje shumë më të ulët të pozitivitetit, kanë ndërmarrë mbyllje dhe masa drastike. A është ky momenti që t'i kthehemi karantinës, a mund të rrezikojmë një kolaps të sistemit shëndetësor ashtu siç ndodhi në mars me disa shtete të fuqishme evropiane? Erion Dasho, mjek i shëndetit publik tha se Shqipëria vazhdon të kryejë shumë pak teste ndërkohë që me këto raste të shtuara duhet të ishim sot në shifrat e 10 mijë testeve. Ai tha se, masat e djeshme për kufizimin e lëvizjes nga ora 22.00-06.00 është një masë e pakuptimtë që nuk ka asnjë rol në parandalimin e COVID.