Pavarësisht se numri i të prekurve nga koronavirusi në Gjermani është shumë i lartë, numri i viktimave është shumë i ulët. Sipas studimeve që janë bërë deri tani, vdekshmëria në Gjermani është 0.18 përqind, shumë më e ulët se Italia që ka 8.3 përqind, Kina me 4 përqind, Britania me 3.9 përqind apo Franca me 29 përqind. Shkencëtarët mendojnë se ka disa arsye për këtë. E para ndoshta nga që Gjermania ka aktualisht 25 mijë shtretër në kujdesin intensiv, çka do të thotë se pacientët e marrin veten më shpejt. Ndërkaq Gjermania ka nisur testimin e hershëm që gjatë muajit janar dhe ndoshta sipas ekspertëve kjo ka bërë që ata të jenë më para me diagnostikimin dhe zbulimin e rasteve. Në Gjermani mund të testohen deri në 12 mijë njerëz në ditë. Një fakt tjetër që thonë studiuesit për Gjermaninë është se popullsia e prekur në Gjermani ka qenë kryesisht e re. Më shumë se 70 përqind e të prekurve janë nga mosha 20 deri në 50 vjeç dhe kjo fashë i reziston më shumë sëmundjes. Megjithatë se si është situata aty realisht dhe çfarë po ndodh me ata që trajtohen në spitalet e Gjermanisë, ne ishim në një lidhje Skype me doktor, Arjan Mullahi, që drejton shërbimin e kirurgjisë në Spitalin e Shën Jozefit në Linnich të Gjermanisë pranë Këlnit dhe që është një nga zonat që ka një numër të lartë të infektuarve por edhe të humbjeve të jetëve që janë shënuar deri tani.