Covid-19 vazhdon ditë pas dite të shënojë një përhapje të numrit të të infektuarve në Shqipëri, ndërkohë që fatkeqësisht ditën e djeshme është shënuar dhe viktima e dytë nga virusi që e ka futur gjithë botën në një pandemi. E përballë kësaj situate në vijën e parë me të infektuarit natyrisht që qëndron armata e mjekëve, infermierëve, personelit shëndetësor. Në një lidhje Skype, Rektori i Universitetit të Mjekësisë, doktor Arben Gjatën njëkohësisht dhe koordinator i Task-Forcës për Koronavirusin në vendin tonë u shpreh se kjo është një situatë që do të përballohet nga sistemi ynë shëndetësor por me bashkëpunimin e qytetarëve. " Kjo është një epidemi me shumë të panjohura dhe të papritura dhe mjekët e kanë treguar se janë të aftë ta përballojnë. Kanë qenë bluzat e bardha që në vitin 1997 kur shteti ra ishin të vetmit në detyrë që u shërbenin njerëzve."- tha ai. I pyetur se sa të gatshëm jemi ne për të përballuar një situatë të përhapjes në masë në spitalet tona, me pajisje por edhe me staf shëndetësor, me statusin Koordinator i Task-Forcës për Koronavirusin, Dr, Arben Gjata tha se: "Ne kemi në dispozicion rreth 9000 shtretër për të përballur këtë epidemi dhe 190 respiratorë në gjithë Shqipërinë. Por ka gjithashtu respiratorë edhe sistemi privat shëndetësor. Pra në këtë luftë të përbashkët nuk do të ketë dallim sistem publik apo privat. Nëse do të jetë e nevojshme do të merren të gjitha pajisjet e sistemit privat për t'u vënë në dispozicion të kësaj beteje të përbashkët kundër Covid-19"