Masat e marra lidhur me distancimin social parashikohet të kenë efekt të rëndësishëm në uljen e përhapjes dhe zgjatjen e kohës për arritjen e pikut të epidemisë. Në një lidhje skype mjeku epidemiolog pranë Institutit të Shëndetit Publik, Alban Ylli sqaroi dhe argumentoi se kur pritet të jetë piku i epidemisë Covid-19 në vendin tonë. "Padyshim që do të kemi më shumë raste. Në Shqipëri do të kemi një qarkullim të virusit në popullatë por është plotësisht e mundur që masat e marra të ndihmojnë në ndalimin e përhapjes. Duket se ka një farë efekti të masave drastike të marra herët por theksoj që kjo mbetet për t'u parë në vazhdimësi. Nisur nga përvoja e Kinës kur rastet filluan të shfaqen në dhjetor por ata u ndërgjegjësuan për ekzistencën e problemit në janar, besohet se nga fundi i javës së dytë rastet fillojnë dhe rriten shumë shpejt. Në Shqipëri unë besoj se masat janë marrë në kohën e duhur; Më datën 13 mars kishim masa drastike ndaj kemi një arsye të besojmë se ditët që do të vijnë do të kemi një kurbë rritjeje më të zbutur". I pyetur për shifrat e rasteve të konfirmuara me Covid-19 në vendin tone mjekut Ylli tha se: "Shifra e rasteve të konfirmuara nuk më tremb më duket e arsyeshme por më shqetëson numri i rasteve reale në popullatë, i cili mundet të vlerësohet sa është por e pamundur të kalkulohet për të ditur me vërtetësi se çfartë po ndodh realisht me virusin në popullatë."