Presidenti Donald Trump ka marrë masat e para në luftën kundër koronavirusit duke anuluar të gjitha udhëtimet nga Evropa për në SHBA. Në një lidhje skype nga Amerika, mjeku Mario Ademaj, i Albanian International Medical Team tha se, vetëm një ditë më parë Presidenti i SHBA-së Donald Trump vendosi anulimin e fluturimeve, si hap i parë në luftën kundër koronavirusit. Por mjeku Ademaj mendon se numri i të prekurve në Shtetet e Bashkuara të Amerikës është shumë më i madh sesa deklarohet për arsyen se nuk po kryhen testimet e gjithë popullatës. "Një merak që ne kemi si staf mjekësor është se këtu në Amerikë nuk po testohen të gjithë njerëzit që janë në risk dhe ne si ekip mjekësor mendojmë se ka më shumë të prekur nga koronavirusi seç deklarohet në të vërtetë"- tha Ademaj. Pyetjes se çfarë medikamentesh po përdor Amerika për të prekurit ai tha se: "Për momentin nuk ka as vaksinë as ilaç që e lufton virusin. 80 % e atyre që infektohen nga koronavirusi kanë simptoma të lehta dhe e kalojnë infeksionin. Ndërkohë ata 20 % që janë popullatë në risk për shkak të sëmundjeve kronike të tjera që kanë mjekimi i tyre jepet në varësi të rastit që paraqitet"- tha ai.