Gjermania duket se është i vetmi shtet në Evropë që po kryhen më shumë testime në javë. Sipas autoriteteve të shëndetësisë në javë kryhen rreth 500 mijë teste, dhe kjo ndoshta shpjegon dhe faktin pse shteti gjerman e ka situatën në dorë edhe pse numri i të infektuarve rritet ndërkohë që vdekjet janë në përqindje të ulët me numrin e rasteve. Megjithatë kjo është ende një qetësi para "stuhisë”, u shpreh Ministri i Shëndetësisë Jens Spahn në Berlin. Natyrisht që në front të kësaj pandemie janë bluzat e bardha që në çdo shtet po asistojnë të sëmurët e po përpiqen të parandalojnë përhapjen e koronës. Ndërkaq tashmë e dimë se Shqipërinë vitet e fundit e lidh edhe eksodi i mjekëve dhe infermierëve me Gjermaninë. Ndoshta në këto ditë si këto që po kalojmë do të donim që këtë personel shëndetësor ta kishim sa më afër, por edhe pse larg duket se ndihma ndaj shqiptarëve vazhdon të jetë e pakursyer. Në këtë situatë të pazakontë mjekët dhe infermierët shqiptarë në Gjermani kanë zgjedhur të krijojnë një shoqatë për t'ju ardhur në ndihmë bashkëkombësve tanë që jetojnë atje. Kanë vendosur të ndihmojnë çdo shqiptar i cili mund të jetë në vështirësi shëndetësore për t'ju rekomanduar këshillat përkatëse por edhe për t'i orientuar në spitalet ku duhet të kërkojnë ndihmë. Për më tepër se si po funksionin ky mekanizëm, por edhe për situatën aktuale që po kalon Gjermania nga përhapja globale e koronës kishim në një lidhje skype, Dr. Ermal Xhaho nga Düsseldorf.