Përgjatë këtyre ditëve herë pas here kemi vënë në dukje dhe nismat e individëve të ndryshëm të cilët në një formë apo tjetër kanë dashur dhe ndjerë njëkohësisht për të kontribuar për të prekurit nga tërmeti shkatërrues i 26 nëntorit. Sot kishim në studio një personazh e cila si fillim bëri “zhurmë” teksa bëri shqiponjën në “Miss Freedom of the World” të mbajtur në Kosovë, pikërisht Miss Serbinë, Irina Jovanka. Ajo ka lindur në Jugosllavi, por jeton në Vjenë dhe ka zgjedhur të fluturojë drejt Shqipërisë pikërisht për të ndihmuar të prekurit nga tërmeti. Përgjatë ditëve të qëndrimit të saj, ajo nuk ka humbur kohë për të vizituar zonat e prekura dhe për t’u njohur më nga afër me pasojat e këtij tërmeti i cili do të mbetet përgjithmonë në mendjen dhe zemrën e të gjithëve…Irina e ka lajmëruar ardhjen e saj në Insta Story-n e saj ku ka shkruar: “Unë nisem nga Viena në Kosovë të Premten në mëngjes në orën 02:00 dhe më pas në Tiranë dhe Durrës. Nëse dikush do donte të dërgonte rroba, batanije apo ngrohëse për të prekurit nga tërmeti, do të jetë e mundur nesër, vendin ua bëj të ditur, më kontaktoni”, ka shkruar ajo në njoftimin e bërë në Instagram. Në studion e Wake Up, Miss Serbia rrëfeu emocionet dhe shpresën për jetën që pa në sytë e atyre njerëzve. Ajo kujtoi momentet dhe historitë më prekëse që përjetoi në Durrës, Laç dhe Vorë mes të prekurve nga tërmeti. "Do kthehem sërish në Shqipëri sepse këta njerëz kanë nevojë për ne. Unë nuk kam shumë para por përmes sensibilizmit dhe dëshirës së mirë ne mund ti ndihmojmë këta njerëz"- ishte mesazhi i saj.