Shqipëria ditët e fundit po shënon shifrat më të larta të prekurve nga Covid19, ndërkohë që shumë vende të tjera evropiane kanë nisur sërish masat kufizuese. Shtetet fqinje si Italia, Greqia kanë nisur zbatimin e protokolleve të reja më të rrepta përsa i përket sistemit arsimor, por edhe të lëvizjes së qytetarëve dhe aktiviteteve të bizneseve. Janë rikthyer kufizimet e lëvizjes me orare , por dhe baret e restorantet në shtete të ndryshme të Evropës po shkojnë drejt mbylljes. Ndërkaq në Shqipëri që prej të enjtes së kaluar ka nisur zbatimi i mbajtjes së maskës sapo del nga shtëpia, si një nga masat parandaluese për përhapjen e infeksionit. Por teksa vendi po shënon rritje të numrit të rasteve kryesisht javën e fundit, të gjithë janë të shqetësuar nëse do të ketë një mbyllje të dytë? Zv. Ministrja e Shëndetësisë njëkohësisht dhe Kryetare të Komitetit të Ekspertëve, doktoreshë Mira Rakacolli dha detaje të situatës në spitale, si po ndiqet protokolli Anti-Covid dhe a rrezikojmë një mbyllje të dytë. Për këtë të fundit Zv, Ministrja, Mira Rakacolli u shpreh se për të arritur në një vendim për një izolim të dytë duhen parë shumë faktorë. "Treguesit janë shumë kompleksë, nuk ka të vetëm, tek i cili duhet të bazohemi që të vendosim për të bërë mbylljen e disa aktiviteteve. Natyrisht që ne po bëjmë të pamundurën ta parandalojmë, dhe kjo është një çështje që ne e diskutojmë shpesh. Por, treguesit të cilët do të na çojnë që të rekomandojmë një mbyllje të dytë janë shumë komplekse. Por numri i jetëve të humbura dhe numri i atyre që kanë nevojë për marrjen e kujdesit intensiv është në rritje, pra, ka një ndërthurje të këtyre numrave, një analizë e thelluar në ndërthurjen e këtyre numrave mund të na çojë në atë masë”- tha Zv.Ministrja Mira Rakacolli.