1000 mësues shtesë për të plotësuar nevojat në rast se kolegët e tyre rezultojnë të prekur me Covid është lëvizja më e fundit që ka bërë Ministria e Arsimit me shtimin e rasteve të infektuarve me Covid-19 në radhët e arsimtarëve. Por a është parashikuar një fond nga ana e Ministrisë së Arsimit për të paguar këtë kontigjent arsimtarësh, ose ata që po punojnë me orë suplementare? Po mësuesit që u duhet të karantinohen e të lënë punën për 2 javë a do të paguhen për kohën e karantinës? Zv.Ministrja e Arsimit, Nina Guga tha se, Ministria ka fonde për mjaftueshëm jo vetëm për t paguar orët suplementare por njëkohësisht do të paguajë të gjitha orët e mësimit për mësuesit e tjerë që do të zëvendësimin e mësuesve të karantinuar. "Dua të theksoj se nëse një mësues karantinohet, për aq ditë sa do të mungojë në klasë, do ta marrë pagesën e plotë. Në momentin që ne flasim është bërë pagesa për muajin shtator dhe mësuesit e karaninuar apo të izoluar për shkak të COVID-19, e kanë marrë të plotë pagën e tyre, po ashtu edhe ata që kanë kryer orë suplementare janë paguar gjithashtu" - tha zv Ministrja e Arsimit Nina Guga.