Ndërkohë që pritet të kalojë në Parlament "Paketa Antishpifje" , gazetarë e aktivistë kanë përgatitur një plan masash për të mos lejuar që kjo gjë të ndodhë. Sot ata po protestojnë para parlamentit pasi i konsiderojnë dy projektligjet e prezantuara si “Paketa Antishpifje” janë kundër fjalës së lirë. Koloreto Cukali, kryetar i Këshillit të Medias dhe Aleksandër Çipa, kryetar i Unionit të Gazetarëve, në një lidhje direkte për Wake Up deklaruan se kjo protestë është për publikun. "Ne si përfaqësues të medias do ta dimë gjithmonë të vërtetën por ajo që ky ligj bën është që këtë të vërtetë të mos kemi mundësi ta përcjellim te publiku. Ndaj kjo protestë është për publikun që ai të ketë mundësi të informohet për të vërtetat në këtë vend"- tha Koloreto Cukali. Nga ana tjetër Aleksandër Çipa deklaroi se" "Ne shpresojmë që ligjvënësit të reagojnë pas kësaj proteste, por dhe nëse ata nuk e bëjnë ne do ta përshkallëzojmë protestën tonë. Si hap të parë do ti kërkojmë presidentit të mos e dekretojë ligjin"- tha ai.