Edhe pse ende nuk janë raportuar raste të infeksionit me koronavirus në Mal të Zi, autoritetet shëndetësore malazeze kanë vendosur masa të rrepta parandaluese, të cilat përfshijnë ndalimin e udhëtimit në vendet më të prekura, si dhe ardhjen e udhëtarëve nga ato vende. Në një lidhje skype, Ilmira Lika drejtoreshë e Tv Teuta në Ulqin tregoi për Wake Up, sesi është situata aktuale në Malin e Zi. "Ka një panik të shtuar në Malin e Zi pas rasteve të konfirmuara në vendet e rajonit. Në barnatore nuk gjen maska dhe njerëzit kanë boshatisur markete. Sot pritet që të mbahet mbledhja e qeverisë malazeze për masat që do të merren në vazhdim për të parandaluar rrezikun e përhapjes."- tha ajo. Ministri malazez i Shëndetësisë Kenan Hrapoviç në një konferencë të jashtëzakonshme për shtyp dje, tha se “udhëtimet për në Itali, Spanjë, Iran dhe Kinë janë të ndaluara. Lista nuk është përfundimtare dhe do të ndryshojë ndërsa zhvillohet situata epidemiologjike. "Fakti që virusi ka mbërritur edhe në Shqipëri na ka frikësuar edhe më shumë pasi mes dy vendeve ka shumë lëvizje të popullatës dhe shumë gjëra na lidhin duke qenë se jemi vend tranzitor, përveç kësaj përhapja e virusit është shumë i shpejtë"- tha Ilmira Lika drejtoreshë e Tv Teuta në Ulqin. Burime të Top Channel thanë se Mali i Zi ka vendosur që të ndalojë futjen e të gjithë autobusët që vijnë nga Shqiptaria dhe ato që kanë destinacion Italianë. Drejtoresha e Tv Teuta u shpreh se sidomos në Ulqin frika është shumë e madhe. " Deri tani për gjithë territorin e Malit të Zi janë bërë 2000 testime dhe të gjithë kanë rezultuar negative deri më tani. Por në Ulqin frika është shumë me e madhe për faktin se këtu shumë afër zonave të banuara është ngritur karantina për njerëzit e prekur nga koronavirusi. Për më tepër në Ulqin nuk ka spital."- tha Ilmira Lika në një lidhje skype nga TV Teuta, Ulqin.