Qeveria e Malit të Zi po mbështet median dhe informacionin e besueshëm mbi pandeminë e koronavirusit, me mbi 250 mijë euro. Më datë 20 mars ministri i Kulturës së Malit të Zi, Aleksandar Bogdanoviç tha se qeveria do të sigurojë mbështetje për sektorin e medias në vend. Ai njoftoi gjithashtu çeljen e një konkursi që do të jepte 150 mijë euro për prodhimin e informacionit ditor në shtypin e shkruar, në përputhje me situatën e pasojave ekonomike të përhapjes globale të koronës. Ndërkohë të paktën 35 mijë euro u janë shpërndarë 14 transmetuesve lokalë, si mbështetje për të kapërcyer vështirësitë nga pandemia.“Në këtë mënyrë, ne dëshirojmë të mbështesim aktivitetin e medias së shkruar dhe prodhimin e informacionit me interes publik, me qëllim ushtrimin e të drejtës së qytetarëve për të qenë të informuar dhe edukuar mbi të gjitha çështjet, problemet dhe pasojat prej përhapjes së koronës. Qëllimi i qeverisë është që të kemi së pari informacion publik objektiv, profesional, të besueshëm në kohë reale, por edhe të mbrojmë qytetarët nga dezinformimi dhe lajmet e rreme”, u shpreh ministri Bogdanoviç. Sipas tij, Agjencia e Medias Elektronike kishte pranuar kërkesën e qeverisë së Malit të Zi, për të çliruar tërësisht nga detyrimet që media elektronike ka ndaj kësaj agjencie, për tre muajt e ardhshëm.