Me siguri, javën që shkoi juve që jeni gjuetarë të historive të rralla nëpër portale, ju ka rënë në sy një shkrim për një makinë model Lotus, ngjyrë portokalli, që kishte nisur të ndërtohej që 10 vite më parë, në fshatin Flykë të Fierit. Ndërsa të tjerë prej jush mund ta kenë shijuar në Sheshin “Skënderbej” ku ajo u ekspozua së fundmi në Panairin e Koleksionit të Mjeteve Historike Retro “N’gaz”. Makina nuk ka një markë, apo emër, ndërsa arkitektët dhe ndërtuesit e saj janë Kadri Manaj dhe shoku i tij Oltion Shatëri. Kadriu me profesion është inxhinier elektrik dhe i ka thelluar studimet në informatikë të aplikuar, kurse shoku i tij i ngushtë është infermier dhe i bashkon pasioni për makinat. Çdo fundjavë, më këmbë a me biçikletë ata përshkonin 5 km deri sa mbërrinin në fshatin Plykë të Fierit ku i priste oazi i tyre i eksperimentit, një shtëpi përdhese me oborr me hapësirë të mjaftueshme ku dy adoleshentët larg zhurmës së qytetit prodhonin ëndrrat e tyre.