Përkeqësimi i situatës për shkak të pandemisë ka bërë që shumë shqiptarë të mbeten në vende të ndryshme të botës. I tillë është edhe rasti i dy boksierëve shqiptarë Krenar dhe Rexhildo Zeneli (kushërinj) të cilët kanë mbetur në Londër prej disa ditësh. Në datat 14-24 mars, në Londër ishte parashikuar të zhvillohej Kampionati Evropian i Boksit, aktivitet i cili u ndërpre në mes për shkak të emergjencës së pandemisë. Në këtë aktivitet Kombëtarja Shqiptare e boksit përfaqësohej nga dy boksierët në fjalë të cilët janë në pritje të një mundësie nga shteti shqiptar për t'u rikthyer në Shqipëri. Ky kampionat do të ishte i vlefshëm edhe për Lojërat Olimpike, të cilat po ashtu janë shtyrë. Ndërkohë Komiteti Olimpik Ndërkombëtar ka marrë të gjitha masat për të siguruar kushte të përshtatshme për qëndrimin e sigurt të dy boksierëve në fjalë. Për shkak të vonesës së çeljes së fondit grant, boksierët kanë udhëtuar me paratë e tyre në këtë aktivitet dhe kjo gjë e ka bërë edhe më të vështirë qëndrimin e tyre për shkak të emergjencës së papritur. Ne ishim sot në një lidhje në skype me dy boksierët për të na treguar më shumë për situatën e tyre.