Tërmeti i 26 nëntorit, ndër të tjera, vuri në dukje edhe një problematikë tjetër, atë që lidhet me depozitat e vendosura sipër tarracave të pallateve. Shumë prej banorëve në zonat e prekura nga tërmeti janë dëmtuar ose kanë rrezikuar jetën e tyre për shkak të depozitave. Ky është një problem i vjetër në Tiranë por edhe në qytete të tjera, pasi prej kohësh është diskutuar lidhur me rrezikun e tyre. Kjo, pasi pesha e tyre e madhe mund të jetë problem për qëndrueshmërinë e ndërtesës, aq më tepër në kohë të fatkeqësive natyrore, siç ishte edhe rasti i tërmetit të fundit. Inxhinierët bëjnë apel që të mos lejohet vendosja e tyre pa kriter nëpër tarraca. Për këtë arsye edhe bashkia e Tiranës, ditët e fundit ka ndërmarrë disa aksione për të hequr një pjesë të depozitave në ato banesa që janë dëmtuar nga tërmeti në kryeqytet.