Emigracioni ka qënë një nga temat më të ndjeshme, veҫanërisht për vitin 2019 pasi shumë shqiptarë kanë ikur jo vetëm nga Shqipëria por edhe kanë lëvizur nga një qytet në tjetrin. Arsyet janë nga më të ndryshmet si: gjendja ekonomike, mundësi për punë e karrierë, angazhime familjare...etj. Një pjesë e konsiderueshme lëvizin për një synim afatgjatë ose për të mos u kthyer në qytetet e tyre. Sipas të dhënave të INSTAT duket se tre qytetet që janë pakësuar më tepër në numër janë: Lezha, Berati dhe Elbasani. Në 2018 rezulton se emigracioni neto për Lezhën ishte minus 135 persona për 10 mijë banorë, për Elbasanin -110 dhe për Beratin -105 persona të ikur. Popullsia e këtyre tre qarqeve është zvogëluar më shumë për shkak të migrimit të brendshëm sesa të emigracionit. Qytetarët, duke kërkuar të ardhura më të larta, një vend pune apo një banesë më të mirë priret që të levizin drejt qyteteve të mëdha, kryesisht drejt Tiranës. Ndërsa përsa i përket qarkut të Kukësit, Dibrës dhe Gjirokastrës, gjatë vitit 2018, si migrimi i jashtëm ashtu edhe lëvizjet e brendshme ndikuan në zvogëlimin e numrit të popullsisë së tyre. Po ashtu, gjatë vitit të kaluar (2018), popullsia e Tiranës është zvogëluar me rreth 5 banorë për 10 mijë dhe në të njëjtën kohë është rritur për shkak të migrimit të brendshëm me rreth 81 banorë për 10 mijë të tillë. Tiranë dhe Vlora janë të vetmet qytete që janë shtuar në numër, pikërisht për shkak të lëvizjeve të brendshme të popullsisë.