Ajo është 77 vjeҫe dhe të gjithë e njohin si "Leta kapela" sepse që prej 50 vitesh ajo nuk del nga shtëpia pa vendosur një nga kapelet e saj të shumta. Violeta Mita Bejleri ka punuar si mësuese e gjuhës shqipe për rreth 30 vite dhe po ashtu ka botuar disa libra. I pëlqen ta mbajë veten dhe të duket sa më bukur, duke u kombinuar nga koka tek këmbët dhe këtë gjë nuk e bën vetëm sot por edhe para viteve '90. Ajo jeton me bashkëshortin pranë zonës ku ndodhet institucioni i Thesarit të Shtetit. Ata e humbën shtëpinë në firmat piramidale dhe prej 23 vitesh janë përshtatur në një kabinë elektrike, midis telave dhe kabllove të rrymës elektrike, në një hapësirë rreth 23 metra katrorë. Bashkëshorti i saj ka punuar si elektriҫist dhe në kohën kur u lirua një nga kabinat e mëdha ata u strehuan aty, për ta shndërruar në "shtëpinë" e tyre.