Durrësi është një nga qytetet më të prekur nga tërmeti i 26 nëntorit, jo vetëm në viktima, të plagosur e dëme materiale por edhe përsa i përket tronditjes së madhe psikologjike. Regjisorja Driada Dervishi, ka qenë aty në kohën që ka rënë ky tërmet dhe akoma vazhdon që të jetë e frikësuar dhe e prekur emocionalisht. Për fat të mirë banesa e saj e cila është një shtëpi private, nuk ka pësur dëme të konsiderueshme që mund të përbëjnë problem. Gjatë gjithë këtyre ditëve ajo ka dëgjuar dhe ka parë nga afër raste nga më të ndryshmet të banorëve që kanë humbur familjarët apo iu janë shkatërruar plotësisht banesat. Po ashtu Driada i ka njohur edhe personalisht disa nga familjet durrsake që janë dëmtuar nga tërmeti i 26 nëntorit.