Në Qendrën Spitalore “Nënë Tereza” këtu në Tiranë, dhe posaçërisht në Shërbimin e Radiologjisë Neurologjike bëhen rreth 500 rezonanca magnetike në muaj dhe 300 ekzaminime me skaner. Por një pjesë e mirë e tyre, konsiderojnë mjekët e këtij Shërbimi, janë të panevojshme, madje të rrezikshme për ata që i kryejnë kot. Pavarësisht përfitimeve që sjellin ekzaminimet radiologjike si grafia, skaneri, rezonanca magnetike, ato kanë edhe efekte anësore tek pacienti për shkak të rrezatimit që përcjellin. Për këtë arsye, mjekët radiologë së fundmi u kanë kërkuar mjekëve të familjeve, por edhe specialistëve nëpër qendra shëndetësore të mos i bien shkurt duke i orientuar pacientët për ekzaminime radiologjike si skaner apo rezonancë magnetike kur diagnoza mund të përcaktohet edhe me një grafi apo ekografi. Sipas mjekëve, rrezatimi është një ndër shkaqet e zhvillimit të tumoreve në organizëm.