Prej vitesh Korça njihet si qyteti i festave dhe veçanërisht për traditën e festës së karnavaleve. Nesër me datë 4 Korrik në këtë qytet do të mbahen karnavalet e Korçës, por për shkak të pandemisë ndryshe nga vitet e shkuara, karnavalet këtë herë do të organizohen në një formë tjetër dhe të veçantë. “Zgjidh maskën, kostumin dhe personazhin tënd” dhe “Shkrepe karnaval” është kjo motoja e këtyre karnavaleve, ku ftohen të gjithë të bëhen pjesë me anë të fotove dhe videove të publikuara në rrjete sociale. Blerta Belliu, Drejtoreshë e Qendrës Kulturore, Korçë tha se këtë vit "Karnavalet e Korçës" pavarësisht situatës së pandemisë nuk do të ndalen. " Nuk ka një korçar që nuk ka një maskë apo një kostum gati për karnavalet. Kjo situatë e pazakontë na ka bërë ta ndryshojmë pak rrjedhën e karnavaleve. Por nuk do të kemi grumbullime masive, nuk do të kemi të ftuar si vitet e kaluara, nuk do të kemi butafori të mëdha por padyshim që do të kemi karnavale kudo në qytet."